Unha xornada para compartir, gozar e seguir construíndo comunidade en torno ao acollemento familiar

Desde Cruz Vermella en Galicia queremos convidar a todas as familias acolledoras da nosa rede a reservar na súa axenda o próximo sábado 20 de setembro, día en que celebraremos unha nova edición de o Encontro de Familias Acolledoras, unha cita anual moi especial que este ano terá lugar na cidade de Lugo.

Será unha xornada pensada para o reencontro, o goce compartido e o recoñecemento a todas as persoas que formades parte desta rede de coidado e compromiso coa infancia. Como en edicións anteriores, haberá actividades diferenciadas para nenas, nenos, adolescentes e persoas adultas, así como un espazo específico de bebeteca para o coidado de bebés, garantindo así a participación de toda a familia.

Moi pronto compartiremos o programa completo e abriremos o formulario de inscrición, pero por agora… animámoste a reservar a data e a preparar as ganas de compartir!

Grazas por seguir formando parte desta gran familia que é o acollemento.