295 nenos, nenas e adolescentes foron acollidos en Galicia entre xaneiro e agosto deste ano. Neste momento 239 menores están en acollida.
O concello de Cenlle acolleu o sábado 21 de setembro o Encontro de Familias Acolledoras de Cruz Vermella en Galicia. Foi no Balneario de Laias, onde máis de 200 persoas entre adultos, nenos/as e adolescentes compartiron unha xornada lúdico-formativa, na que puideron intercambiar experiencias e afondar en diferentes aspectos da educación e crianza dos nenos e nenas.
No acto de benvida ás familias interviñeron Jacobo Rey, director xeral de Familia, Infancia e Dinamización Demográfica da Xunta de Galicia, Mercedes Casanova, presidenta de Cruz Vermella en Galicia; Rebeca Sotelo, alcaldesa de Cenlle; e Felipe Ferreiro, presidente de Cruz Vermella en Ourense.
Conducida pola xornalista Eva Conde-Corbal, a sesión didáctica dedicou un primeiro tempo á atención temperá de nenos e nenas de 0 a 6 anos, da man de Rocío García, Vicepresidenta da Asociación Galega de Atención Temperá. Nunha segunda parte a sesión centrouse noutra importante etapa de desenvolvemento, a adolescencia, coa participación de Ricardo Fandiño, coordinador da Asociación para a Saúde Emocional na Infancia e na Adolescencia. Tamen houbo un tempo para o desfrute da arte, da man de Álvaro Romero, que protagonizou un número de maxía e para finalizar contamos con Alba Pérez, que nos representou “Desvariado” un exercicio persoal de danza contemporánea.
A rede de familias acolledoras de Cruz Vermella en Galicia está formada por 339 familias, pero sempre se precisan máis persoas dispostas a colaborar xa que, deste modo, haberá máis posibilidades para dar a resposta máis axustada a novos casos, tendo en conta as características e necesidades dos nenos/as. Este ano entre xaneiro e agosto foron acollidos 295 menores polas familias da rede. Nestes momentos hai 239 nenos, nenas e adolescentes que están sendo acollidos, mentres que 56 están á espera de acollemento.
O acollemento familiar é un proxecto vivo, no que non existe unha familia tipo e onde cada acollemento é tan único como os nenos e nenas do programa. O requisito imprescindible para ser familia acolledora é non ter finalidade adoptiva. Despois, o equipo técnico de Cruz Vermella acompaña ás familias desde o primeiro momento e durante todo o proceso de acollemento.
